चिमुकल्यांच्या आरोग्याशी खेळ, अन्नसुरक्षा विभागाकडे तक्रार दाखल!
अक्षराज : प्रतिनिधी
दि.३०, हिमायतनगर (नांदेड) : हिमायतनगर शहरात आरोग्याला घातक ठरणारी धक्कादायक घटना उघडकीस आली आहे. स्थानिक किराणा दुकानातून खरेदी केलेल्या ‘ट्वेंटी-ट्वेंटी’ बिस्किटाच्या पुड्यामध्ये जिवंत अळ्या निघाल्याची धक्कादायक बाब समोर आली आहे. विशेष म्हणजे, या बिस्किटाच्या पुड्यावर नोव्हेंबर २०२५ पर्यंतची एक्सपायरी डेट स्पष्टपणे नमूद असूनही त्यामध्ये अळ्या असल्याचे आढळले आहे.
ही बिस्किटे दैनिक अक्षराज हिमायतनगर प्रतिनिधी रमेश पंडित यांचे चिरंजीव यांनी खाल्ली. बिस्किट खाल्ल्यानंतर काही वेळातच त्यांना उलट्या व तीव्र मळमळ होऊ लागल्याने घरच्यांनी तातडीने वैद्यकीय उपचाराची सोय केली. या प्रकारानंतर घरच्यांनी संशयाने उर्वरित पुडा फोडून पाहिला असता त्यामध्ये जिवंत अळ्या रेंगाळताना दिसल्या. या घटनेनंतर परिसरात मोठी खळबळ उडाली आहे.
याबद्दल रीतसर तक्रार तहसीलदार यांच्यामार्फत अन्न व औषध प्रशासन मंत्री तथा अन्न व औषध प्रशासन विभाग नांदेड यांच्याकडे निवेदनाच्या माध्यमातून केली.
ग्राहकांच्या आरोग्याशी खेळ करणाऱ्या अशा निष्काळजीपणाविरुद्ध संताप व्यक्त करण्यात येत आहे. संपादक रमेश पंडित यांनी याप्रकरणी संबंधित कंपनी तसेच स्थानिक एजन्सी चालकाविरुद्ध अन्नसुरक्षा विभागाकडे औपचारिक तक्रार दाखल करून याबद्दल अपेक्षित कार्यवाहीची मागणी केली आहे.
तसेच स्थानिक नागरिकांनीही संताप व्यक्त करत तातडीने तपास करून दोषींवर कठोर कारवाईची मागणी केली आहे. यामुळे अन्नसुरक्षेचा प्रश्न पुन्हा एकदा ऐरणीवर आला असून निष्काळजी कंपन्यांना वेळीच धडा शिकवणे आवश्यक असल्याची मागणी होत आहे.
