वादग्रस्त विधानानंतर लोहगावमध्ये तणाव ; आमदार पठारे यांनी नियंत्रण राखले
लोकप्रतिनिधीच सुरक्षित नसतील तर सामान्य लोकांचं काय ?
अक्षराज : प्रणिल कुसाळे
दि.०५, लोहगाव (पुणे) : लोहगाव परिसरात शनिवारी सायंकाळच्या सुमारास एका स्थानिक कार्यक्रमादरम्यान वादग्रस्त घटना घडली. आमदार बापू पठारे यांच्या उपस्थितीत त्यांच्या समर्थक गट आणि बंडू खांदवे यांच्या गटामध्ये किरकोळ वाद लगेचच तणावात बदलला. काही वादग्रस्त विधानांमुळे वातावरण आणखी तापले आणि अंदाजे 30 ते 40 कार्यकर्ते थेट बापू पठारे यांच्यावर गेले, ज्यामुळे उपस्थित नागरिकांमध्ये चिंता निर्माण झाली.
घटनेवेळी सुरेंद्र पठारे यांनी मीडियाला स्पष्ट केले की, “CCTV पाहून योग्य ती कारवाई आणि गुन्हा दाखल केला जाईल. बंडू खांदवे उद्या आंदोलनाची घोषणा करत आहेत, हे वादग्रस्त विधान अधिक वाढले. परिस्थिती पेटली तरी आम्ही शांततेची भूमिका घेतली आणि आमदारांचे संरक्षण सुनिश्चित केले.”
घटनेची माहिती मिळताच विमाननगर पोलीस ठाण्याचे वरिष्ठ पोलीस निरीक्षक तात्काळ घटनास्थळी दाखल झाले. पुणे शहराचे पोलीस आयुक्त अमितेश कुमार यांनी देखील तात्काळ हस्तक्षेप करून आवश्यक निर्देश दिले, ज्यामुळे परिस्थिती अधिक नियंत्रणात राहिली. पोलीस उपस्थितीमुळे नागरिकांमध्ये सुरक्षिततेची भावना निर्माण झाली आणि कोणतीही गंभीर हिंसा टाळता आली.
कार्यक्रमादरम्यान स्थानिक विकास आणि संघटनात्मक चर्चेदरम्यान मतभेद व्यक्त होताच वाद निर्माण झाला, मात्र आमदार बापू पठारे यांनी तत्काळ हस्तक्षेप करून संपूर्ण कार्यक्रम शांततेत पार पडला. उपस्थित कार्यकर्त्यांनी आणि आयोजकांनीही वातावरण सौम्य ठेवण्यासाठी मदत केली.
सुरेंद्र पठारे यांनी आणखी सांगितले की, “संपूर्ण घटना नोंदवली गेली आहे आणि संबंधितांवर योग्य ती कारवाई होईल. निवडणुकीच्या वेळी असे स्टंट करणे बंडू खांदवे यांचे नेहमीचे धोरण आहे.”
आमदार बापू पठारे यांनी उपस्थित कार्यकर्त्यांना आवाहन केले, “मतभेद हे राजकारणाचा भाग असतात, पण संवाद आणि शांतता हाच खरा मार्ग आहे. लोहगावने नेहमीप्रमाणे एकतेचा आदर्श कायम ठेवावा.”
घटनेनंतर दोन्ही गटांमध्ये संवाद आणि समन्वयाचे वातावरण निर्माण झाले असून परिसर सध्या स्थिर आहे. पुढील चौकशी सुरू असून परिस्थितीची अधिक माहिती नंतर समोर येईल.
