पहलगाम अतिरेक्यांच्या हल्ल्यात डोंबिवलीतील ३ पर्यटकांचा मृत्यू !

मृतांच्या नातेवाईकांना मदतीसाठी जिल्हा प्रशासन तत्पर…

अक्षराज : जे. के. पोळ

दि.२२, ठाणे : जम्मू- काश्मिरमधील पहलगाममध्ये दहशतवाद्यांनी पर्यटकांवर भ्याड हल्ला केला. दहशतवाद्यांच्या गोळीबारात २७ पर्यटकांचा मृत्यू झाला आहे. यामध्ये महाराष्ट्रातील पर्यटकांचाही समावेश आहे.
पहलगाम इथे झालेल्या दहशतवादी हल्ल्यात डोंबिवली शहरातील नवापाडा, पांडुरंग वाडी आणि नांदिवली परिसरात राहणाऱ्या हेमंत जोशी,संजय लेले आणि अतुल मोने या तिघांचा मृत्यू झाल्याची माहिती मिळाली आहे.

मृतांच्या नातेवाईकांना सर्व प्रकारची मदत तत्परतेने करण्यासाठी जिल्हा प्रशासन पूर्णतः कार्यरत आहे.
या संपूर्ण परिस्थितीवर राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, मुख्य सचिव सुजाता सौनिक, विभागीय आयुक्त डॉ.विजय सूर्यवंशी आणि जिल्हाधिकारी अशोक शिनगारे हे जातीने लक्ष ठेवून आहेत. त्यांनी मृतांच्या नातेवाईकांना आवश्यक ती सर्व मदत करण्याबाबत संबंधित यंत्रणांना सूचित केले आहे.
या पार्श्वभूमीवर जिल्हाधिकारी कार्यालय आणि जिल्हा आपत्ती व्यवस्थापन प्राधिकरण ने नागरिकांना आवाहन केले आहे की, पहलगाम येथे आपल्या जिल्ह्यातील कोणी व्यक्ती असल्यास किंवा आपल्या ओळखीतील कोणी नातेवाईक किंवा व्यक्ती असल्यास त्याची माहिती तात्काळ 9372338827 / 7304673105 या क्रमांकांवर जिल्हा प्रशासनास कळवावी. त्याचप्रमाणे श्रीनगरमध्ये पर्यटकांसाठी २४x७ मदत कक्ष सुरू करण्यात आला असून जिल्हा मुख्यालयात जिल्हाधिकारी कार्यालयात २४ तास कार्यरत असलेला आपत्कालीन नियंत्रण कक्ष आणि मदत डेस्क स्थापित करण्यात आला आहे.
या कक्षाच्या माध्यमातून पर्यटकांना कोणत्याही वेळी मदत मिळू शकेल. त्यांना काही अडचण आल्यास किंवा आपत्कालीन परिस्थितीत ते खालील क्रमांकावर संपर्क साधू शकतात:
दूरध्वनी क्रमांक:
०१९४-२४८३६५१
०१९४-२४५७५४३
व्हॉट्सॲप क्रमांक:
७७८०८०५१४४
७७८०९३८३९७
अशी माहिती जिल्हा प्रशासनाने दिली आहे.

काश्मिरात पर्यटकांवर अतिरेकी हल्ला ! २८ ठार, २४ जखमी

अक्षराज : वृत्तसंकन

दि .२३ , जम्मू काश्मीर : पुलवामा नंतर आता पहलगाम हल्ला ! पोलिसांच्या वेशातील ८ ते १० दहशतवाद्यांनी पर्यटकांना नावे विचारली, आयकार्ड बघितली अन् गोळ्या घातल्या; मृतांमध्ये महाराष्ट्रासह विविध राज्ये, विदेशातील पर्यटकांचा समावेश, २४ जखमींमध्ये महाराष्ट्रातील दोघे; दहशतवाद्यांनी केले ‘टार्गेट किलिंग’

जम्मू: काश्मीर खोऱ्यातील पहलगामच्या बैसरन घाटी भागात दहशतवाद्यांनी मंगळवारी पर्यटकांवर केलेल्या बेछूट गोळीबारात २८ जणांचा मृत्यू झाला असून २४ जण जखमी झाल्याची माहिती आहे. दहशतवादी पोलिसांच्या वेशात होते. त्यामुळे पर्यटकांना त्यांचा संशय आला नाही. हल्लेखोर दहशतवादी ८ ते १० च्या संख्येतील असल्याचे प्रत्यक्षदर्शींनी सांगितले. दहशतवाद्यांनी ४० पर्यटकांना घेरुन आधी त्यांची नाते विचारली आणि विशिष्ट धर्मीय नावे असलेल्या पर्यटकांना गोळ्या घातल्या, असे काही प्रत्यक्षदर्शींनी सांगितले. या हल्ल्यात नौदलाच्या एका वरिष्ठ अधिकान्याचाही मृत्यू झाला. दिल्ली मुंबईसह देशभरात सतर्कतेचा इशारा देण्यात आला आहे. हल्ल्याची माहिती मिळताच सुरक्षा दलांनी घटनास्थळ व परिसराला घेराव घातला त दहशतवाद्यांचा कसून शोध सुरु केला. जखमींमध्ये महाराष्ट्रातील माणिक पाटील, रिनी पांडे, एस. बालचंद्र यांचा तसेच गुजरात, ओडिशा, कर्नाटक या राज्यांतील पर्यटकांचाही समावेश आहे. अमेरिकेचे उपाध्यक्ष जे. डी. व्हान्स भारत दौऱ्यावर आले असताना हा भ्याड हल्ला झाला. एका प्रत्यक्षदर्शींने सांगितले की, दहशतवाद्यांनी जवळून गोळीबार केला. एका पर्यटकाच्या डोक्यात गोळी लागल्याची माहिती त्याच्या पत्नीने एका वृत्तसंस्थेला दिली. बैसरन घाटी या उंचावरील ठिकाणाहून हेलिकॉप्टरने जखमींना पहलगामला आणण्यात आले. हशतवाद्यांनी पर्यटकांवर गोळीबार केल्याची माहिती मिळताच सुरक्षा जवानांनी काश्मीर बैसरन घाटी भागात असलेल्या घटनास्थळाकडे धाव घेतली. (रोजारी) पतीच्या मृतदेहाशेजारी बसलेली एक महिला. हे नवपरिणीत ओइपे हनिमूनसाठी आले होते.

पर्यटक जमिनीवर रक्ताच्या थारोळ्यात पडले, नातेवाइकांनी मदतीसाठी फोडला हंबरडा

दहशतवादी हल्ला झाल्यानंतर जखमी व त्यांच्या नातेवाइकांनी मदतीसाठी हंबरडा फोडल्याचे दृश्य हृदय पिळवटून टाकणारे असल्याचे प्रत्यक्षदर्शीनी सांगितले, काही पर्यटक रक्ताच्या थारोळ्यात पडले होते. अतिशय क्रूर पद्धतीने हा हल्ला करण्यात आल्याचे स्थानिकांनी सांगितले. अंगलातून काही दहशतवादी आले व त्यांनी सुमारे ४० पर्यटकांना घेराव घालून अंदाधुंद गोळीबार केला. गोळीबाराला सुरुवात होताच तिथे छोटा-मोठा व्यवसाय करणाऱ्या स्थानिक नागरिकांनी जीव वाचविण्यासाठी पलायन केले. मात्र, पर्यटकांना निसटणे शक्य झाले नाही. या गोळीबारातून बचावलेल्या एका महिलेने सांगितले की, माझ्या नवन्याच्या डोक्याला गोळी लागली आहे. तो विशिष्ट धर्माचा असल्यामुळे त्याच्यावर दहशतवाद्यांनी हल्ला केला. या हल्ल्याचा एक व्हिडीओ सोशल मीडियावर प्रसारित झाला आहे. त्यात अनेक लोक रक्तबंबाळ अवस्थेत अमिनीवर निपचित पडले आहेत. तसेच महिला पर्यटक हंबरडा फोडत त्याच्या आप्तजनांचा शोध घेताना दिसत होते. काही पर्यटक या हल्ल्यामुळे खूप हादरले होते व स्थानिक त्यांना सावरण्याचा प्रयत्न करीत होते.

गृहमंत्री अमित शाह तातडीने काश्मीरला; घेतली उच्चस्तरीय बैठक

पर्यटकांवर दहशतवाद्यांच्या गोळीबारानंतर केंद्रीय गृहमंत्री अमित शाह तातडीने जम्मू-काश्मीरला रवाना झाले. पंतप्रधान नरेंद्र मोदी यांनी या हल्ल्याचा तीव्र निषेध केला असून, शाह यांना तातडीने त्यांनी काश्मीरला जाण्यास सांगितले. गोळीबारानंतर त्या केंद्रशासित प्रदेशात उद्‌भवलेल्या परिस्थितीवर वरिष्ठ अधिका-यांशी व्हिडीओ कॉन्फरन्सिंगद्वारे चर्चा केल्याचे त्यांनी म्हटले आहे. श्रीनगरमध्ये पोहोचल्यानंतर शाह यांनी सर्व सुरक्षा यंत्रणांच्या अधिकाऱ्यांसमवेत एक बैठक घेतली.

ठाणेकरांनो, पाणी जपून वापरा, पाण्याचा अपव्यय टाळून पाणी बचत करा

अक्षराज : विनोद वास्कर
दि. १७, ठाणे : सध्या तीव्र उन्हाळा असल्याने धरणातील पाण्याची पातळी दिवसेंदिवस कमी होत आहे. तसेच विहिरी व कूपनलिकांच्या पाण्याच्या पातळीत मोठ्या प्रमाणात घट झालेली आहे. पावसाळा सुरू होईपर्यंत तीव्र पाणी टंचाई निर्माण होऊ नये यासाठी नागरिकांनी पाण्याचा काटकसरीने वापर करुन पिण्याच्या पाण्याचा वापर गाड्या धुणे, व नळ सुरू ठेवून काम करणे टाळावे व पाण्याची बचत करावी असे आवाहन ठाणे महापालिकेच्या पाणीपुरवठा विभागाच्यावतीने करण्यात आले आहे.

शक्यतो गाड्या धुवू नयेत त्या ऐवजी बोअरवेलच्या पाण्याने ओल्या कपड्याने गाड्या पुसाव्यात. अंगणात शक्यतो पाणी मारु नये, नळ सुरू ठेवून कपडे धुणे, भांडी घासणे, दाढी करणे टाळावे. घरातील नळांची गळती दुरूस्त करावी. तसेच सोसायटीतील गळकी टाकी, पाईप, व्हॉल्व्ह दुरूस्त करावेत. इमारतीच्या छतावरील टाकी ओव्हरफ्लो होणार याची दक्षता घ्यावी, अन्यथा याबाबत तक्रारी प्राप्त झाल्यास अथवा तसे आढळून आल्यास संबंधीत इमारतीचे / सोसायटीचे नळ कनेक्शन खंडीत करण्यात येईल. शक्यतो रोज आंघोळीसाठी शॉवर व बाथटबचा वापर करु नये.

स्वच्छतागृहांमध्ये डुअल फ्लशचा वापर करावा. इमारतीतील जिने धुण्यासाठी पिण्याचे पाणी वापरु नये. पाण्याचा अनावश्यक साठा करु नये व साठा केलेले पाणी रोज सकाळी ओतून देण्याची सवय बंद करावी. इमारती/सोसायटी/संकुलांमधील तरण तलावास पिण्याचे पाणी वापरु नये व वारंवार पाणी बदलण्यात येऊ नये. शक्यतो आठवड्यातील पाच दिवस धुण्यायोग्य सगळे कपडे एकत्र करुन एकाच दिवशी धुवावेत. इतर दिवशी गरज पडल्यास दररोज लागणारे छोटे कपडे हाताने कमी पाण्यात धुवावेत. कपडे धुण्याचे मशीन आठवड्यातून एकदा किंवा अगदी आवश्यक असेल तेव्हा दोनदाच आणि ते पूर्ण क्षमतेने वापरावे असे केल्यास पाण्याची बचत व मशीनचा पुर्ण क्षमतेने वापर होण्यास मदत होईल. त्याचप्रमाणे कपडे धुण्याचे मशीन किंवा हाताने कपडे धुवून निर्माण होणारे निरुपयोगी पाणी साठवण करुन पुढचे दोन दिवस फ्लश, बाथरुम धुणे, फरशी पुसणे, गाड्या धुणे व बगीचा आदीसाठी वापरावे. ‘पाणी अनमोल आहे, पाण्याचा प्रत्येक थेंब वाचवा, पाणी वाचवा, पाण्याचा अपव्यय / नासाडी टाळा’ असे आवाहन ठाणे महापालिकेच्यावतीने करण्यात आले आहे.

४५ व्या कुमार राज्यस्तरीय अजिंक्यपद कुस्ती स्पर्धेत सुरज हजारी ने पटकावला प्रथम क्रमांक

अक्षराज : विनोद वास्कर
दि. १६, कल्याण (ठाणे) : नुकतीच ४५ वी कुमार राज्यस्तरीय अजिंक्यपद कुस्ती स्पर्धा सन २०२४ -२५ पुणे येथे पार पडली. सौजन्य मामासाहेब मोहोळ कुस्ती संकुलन संघ पुणे, आयोजक पे पंकज सुरजदादा हरपुडे यांनी ही स्पर्धा आयोजित केली होती. या स्पर्धेमध्ये नाऱ्हेण गावातील सुपुत्र.कु.सुरज भगवान हजारी यांनी पुणे येथे ४५ वी कुमार महाराष्ट्र केसरी कुस्ती स्पर्धेमध्ये प्रथम क्रमांक पटकावला आहे.

४५ वजनी गटात त्यामुळे त्याच्यावर कौतुकाचा वर्षाव होत आहे. पंचकोशीतील नागरिक त्याच्यावर अभिनंदन शुभेच्छाचा वर्षाव करत आहे. आई-वडिलांना, नातेवाईक मंडळींना आणि ग्रामस्थांना आनंद झाला आहे. सुरज हजारी यांनी आपल्या गावाचं नाव महाराष्ट्राच्या कानाकोपऱ्यात पोचवला आहे. आई-वडिलांचं आणि गावाचं नाव काढलं आहे. सुरज हजारीने वडिलांचे नाव भगवान राम हजारी व आईचे नाव रंजना भगवान हजारी आणि त्याचे वस्ताद चे कुशल गजानन पाटील यांनी खूप मेहनत घेऊन पैलवान घडवला आहे.

गावात तालीम नाही, व्यायामशाळा नाही तरी त्याचे वस्ताद कुशल पाटील त्याला १५ किलोमीटर घेऊन देसाई गावात सराव करण्यासाठी दररोज घेऊन जायचे. देसाई गावातील वस्ताद शत्रूगन पाटील यांनी सुरज हजारी त्यांच्याकडून खूप मेहनत करून घ्यायचे. आज फल आपल्याला दिसत आहे. सुरेश हजारी चे वडील गरीब असल्यामुळे पाहिजेतसे खुराक त्याला मिळत नव्हते. तरी सुरज खूप मेहनत करून आज कुमार महाराष्ट्र केसरी झाला. कष्ट आणि चिकाटी आणि आई-वडिल वस्ताद यांचा आशीर्वाद मुळे सुरज हजारी कुमार महाराष्ट्र केसरी झाला. आज संपूर्ण ठाणे जिल्हा आणि गाव अभिमानाने. सुरज हजारी याचे कौतुक करत आहे.

काल गावातील ग्रामस्थांनी, पंचक्रोशीतील वस्ताद आणि कुस्ती पैलवानांनी आपापल्या पद्धतीने रक्कम देऊन मदत केली आहे. त्या सर्वांनी त्याचा सत्कार सुद्धा केला आहे. आई-वडिलांना गावातील ग्रामस्थांना खूप आनंद झाला आहे. पोरांनी आई-वडिलांचे आणि गावाचं नाव काढलं महाराष्ट्राच्या कानाकोपऱ्यात पोचवला आहे.

अल्पवयीन दुचाकीस्वाराचा अपघातात मृत्यू !

अक्षराज : प्रणिल कुसाळे

दि.१६, येरवडा (पुणे) :

येरवड्यातील गोल्फ क्लब रस्त्यावर मोटारीची धडक, भरधाव मोटारीच्या धडकेत अल्पवयीन दुचाकीस्वाराचा मृत्यू झाल्याची घटना येरवड्यातील गोल्फ क्लब रस्त्यावर घडली. अपघातात दुचाकीस्वार अल्पवयीनाबरोबर असलेली सहप्रवासी मैत्रीण जखमी झाली. अपघातानंतर पसार झालेल्या मोटार चालकाचा पोलिसांकडून शोध घेण्यात येत आहे.

अपघातात मृत्युमुखी पडलेला १४ वर्षीय मुलगा येरवड्यातील कामराजनगर भागातील आहे. दुचाकीस्वार अल्पवयीन आणि त्याची मैत्रीण सोमवारी दि. १४ दुपारी तीनच्या सुमारास येरवडा भागातील एका जलतरण तलावात पोहण्यासाठी निघाले होते. गोल्फ क्लब चौकाकडे जाणाऱ्या रस्त्यावर भरधाव मोटारीने दुचाकीला पाठीमागून धडक दिली. दोघांना तातडीने खासगी रुग्णालयात दाखल करण्यात आले. परंतु उपचारादरम्यान अली मोहम्मद शेख या मुलाचा मृत्यू झाला.

धक्कादायक ! बापानेच स्वतःच्या १४ वर्षाच्या मुलीवर केला बलात्कार…

शिळ-डायघर पोलीस स्टेशन मध्ये गुन्हा दाखल

अक्षराज : विनोद वास्कर
दि. १५, शिळफाटा (ठाणे) : शिळ-डायघर पोलीस स्टेशनच्या हद्दीमध्ये असलेल्या कल्याण फाटा परिसरातील अभयनगर मध्ये असलेल्या अभयनगर चाळ, पोस्ट पडले, ता.जि.ठाणे या ठिकाणी बापलेकीच्या नात्याला काळीमा फासणारी घटना घडली आहे. बापानेच आपल्या पोटच्या १४ वर्षीय अल्पवयीन मुलीवर बलात्कार केला आहे. मुलीच्या मनाविरुद्ध जबरदस्तीने शारीरिक संबंध प्रस्थापित केले व त्यामुळे ती गर्भवती राहून तिची प्रसुती झाली म्हणून शिळ-डायघर पोलीस स्टेशन मध्ये बापावर गुन्हा दाखल करण्यात आला आहे. मुलीच्या आईने फिर्याद नोंदवली आहे.

आरोपी महेश रामसुंदर जयस्वाल (मुलीचा बाप) ३ ऑगस्ट २०२४ पासून तो ३ एप्रिल २०२५ पर्यंत अभयनगर मध्ये असलेल्या चाळ मध्ये राहत्या घराच्या किचनमध्ये मुलीच्या मनाविरुद्ध जबरदस्तीने शारीरिक संबंध करीत होता. म्हणजेच ९ महिने तिच्यावर तो अत्याचार करत होता. मुलीच्या आईच्या तक्रारीनंतर शिळ -डायघर पोलीस स्टेशन, ठाणे मध्ये आरोपीवर गुन्हा रजि. न. कलम ३७०/२०२५ भारतीय न्याय संहिता कलम ६५ (१), ६८ (अ), ६४(२) (एफ), बालकाचे लैंगिक अपराधापासुन संरक्षण अधिनियम २०१२ चे कलम ४, ६, ८, १२ प्रमाणे कलम लावण्यात आले आहे. दाखल अधिकारी, तपासी अधिकारी सपोनि/ प्रशांत खरात, ( शिळ डायघर पोलीस स्टेशन )यांच्याकडे सध्याही केस आहे. भेट देणारे अधिकारी वपोनि/संदिपान शिंदे, पोनि/गुन्हे जयंत राजूरकर, पोनि/प्रशांत खरात या सर्वांनी ५ एप्रिल २०२५रोजी रात्री १२:२०वा घटनास्थळी भेट दिली.
कल्याण फाटा, पडले, डायघर, शिळ फाटा, खार्डी, देसाई, खिडकाळी, फडके पाडा, शिळ ठाकूरपाडा, भोलेनाथ नगर, या सर्व परिसरातील नागरिक प्रशासन कडे मागणी करत आहेत. आरोपीवर कठोर ते कोठार शिक्षा करण्यात यावी. जेणेकरून पुन्हा या परिसरामध्ये अशी घटना घडणार नाही. हा खटला फास्टट्रॅक वर चालवण्यात यावा. अशी मागणी जोर धरू लागली आहे. समाजामध्ये अशा नराधम बापाला जगण्याचा अधिकार नाही. माणुसकीपणाला लाज वाटावी, मन स्तब्ध करणारी मानवतेला लज्जा वाटेल अशी घृणास्पद घटना आहे.

अक्षराज मीडियाच्या पत्रकारास शिळफाट्याच्या भर चौकात मारहाण

अक्षराज : प्रतिनिधी 

दि.२८, दिवा (ठाणे) : शुक्रवार, दिनांक २८ मार्च २०२५ रोजी अक्षराज मीडियाचे कल्याण ग्रामीण विधानसभा पत्रकार विनोद वास्कर यांना दुपारच्या सुमारास  शिळफाट्याच्या भर चौकात राहुल काटे आणि जितू आलीमकर या गावगुंडानी मारहाण केली आहे. विनोद वास्कर यांना त्यांनतरउपचारासाठी कळवा येथील छत्रपती शिवाजी महाराज रुग्णालयात दाखल करण्यात आले आहे.  

गावागावातील बातम्या प्रकाशित करत असल्याने मारहाण झाल्याची प्राथमिक माहिती समोर आली आहे. या घटनेची माहिती मिळताच ग्रामस्थांनी शिळ डायघर पोलीस ठाण्यावर धडक दिली आहे.पत्रकाराचा मेडिकल रिपोर्ट आल्यानंतर या प्रकरणाची संपूर्ण माहिती घेऊन तक्रार दाखल केली जाईल. अशी माहिती शिळ डायघर पोलिसांनी दिली. तसेच पोलिसांकडून आरोपींचा शोध देखील सुरू करण्यात आला आहे.

वाहन तोडफोड फरार आरोपी आखिर अटक !

अक्षराज : प्रणिल कुसाळे

दि.१५, येरवडा (पुणे) : लक्ष्मीनगर येरवडा परिसरात रस्त्यालगत उभ्या असलेल्या १२-१४ वाहनांची धारदार कोयता शस्त्राने तोडफोड करून, ‘मी भाई आहे,’ असे म्हणत परिसरात दहशत निर्माण करणाऱ्या एकाला गुन्हे शाखा युनिट -४ पथकाने अटक केली आहे. पोलिसांनी दिलेल्या माहितीनुसार हा प्रकार लक्ष्मीनगर येरवडा येथील मातोश्री शाळा येथे हा प्रकार घडला होता. येरवडा डेक्कन कॉलेज परिसरात रात्रीच्या सुमारास अंगावरती काळ्या कलरची टी-शर्ट – व ग्रे कलर पॅन्ट डेक्कन कॉलेज रस्तालगत आरोपी डोलारे थांबला आहे. खात्रीशीर बातमी गुन्हे शाखा. युनिट ४ पोलीस अंमलदार राहुल परदेशी, देविदास वांढरे यांना मिळाली असताना.

डेक्कन कॉलेज या परिसरातून आरोपीला शिताफिने ताब्यात घेण्यात आले . सयाजी डोलारे वय (वय २०रा. सर्वे १२ पवार चाळ लक्ष्मी नगर येरवडा) असे अटक केलेल्या आरोपीचे नाव आहे. याप्रकरणी स्थानिक नागरिकांनी फिर्याद दिली होती. सदरची उल्लेखनीय कामगिरी गुन्हे शाखा युनिट ४ पथकाचे पोलीस निरीक्षक अजय वाघमारे यांच्या मार्गदर्शनानुसार करण्यात आली .

“अक्षराज मीडिया” पत्रकारांसाठी नियमावली

नमस्कार….
“अक्षराज मीडियाची” सुरुवात ही थोर समाजसेविका सिंधुताई सपकाळ (माई) यांच्या शुभ आशीर्वादाने दिनांक १५ ऑगस्ट २०२१ रोजी करण्यात आली. “अक्षराज मीडिया” हे जनतेला न्याय मिळावा तसेच जनतेच्या समस्या सोडविल्या जाव्यात या हेतूने महाराष्ट्रभर कार्यरत आहे.
“नियमावली का….?”
पत्रकारांना काम करण्यासाठी सोपे व्हावे, मनात असलेल्या प्रश्नांची उत्तरे मिळावी. प्रामाणिकपणे काम व्हावे, पत्रकारांना शिस्त व समयसूचकता असावी हाच प्रामाणिक उद्देश.

१) “अक्षराज मीडियाला” पत्रकार होण्यासाठी काय आवश्यक?

• शिक्षण कमीत कमी ग्रॅज्युएशन असावे.
   • पत्रकारितेची आवड व गोडी असावी.
• बातमीदारी विषयीचे ज्ञान असावे किंवा अनुभव असावा.
• सामाजिक किंवा राजकीय क्षेत्राचा अभ्यास असावा.
• प्रसार माध्यमांचे ज्ञान असावे.

कागदपत्रे

• शैक्षणिक कागदपत्रे (मार्कशीट आणि टी. सी)
• पत्रकारिता कोर्स किंवा शिक्षण झाले असेल तर त्याची मार्कशीट
• आधार कार्ड दोन्ही बाजू
• पासपोर्ट साईज फोटो (स्पष्ट)
• विनंती अर्ज व हमी पत्र
• १५०० रु. जॉईनिंग फी (पोस्टल चार्जेस इतर)

२) कामाचे स्वरूप-

• पत्रकारांनी दर १५ दिवसांनी होणाऱ्या ऑनलाइन बैठकीस उपस्थित असणे आवश्यक आहे.
• पत्रकारांनी वरिष्ठांच्या सूचनांचे काटेकोर पालन करणे बंधनकारक आहे.
• पत्रकारांचे कोणतेही काम प्रोटोकॉल नुसारच होईल.

प्रोटोकॉल पुढीलप्रमाणे-
संपादक + सहसंपादक
जिल्हा प्रतिनिधी
विधानसभा प्रतिनिधी 
तालुका प्रतिनिधी
शहर प्रतिनिधी
गट प्रतिनिधी

• पत्रकारांची दरवर्षी (जानेवारी महिन्यात) पदोन्नती व पद अवनती करण्यात येईल.
  • एखादा पत्रकार सलग २ महिन्यापर्यंत सक्रिय नसल्यास त्याची नियुक्ती रद्द करण्यात येईल.

■ बातमी विषयी महत्वाचे-

• पत्रकारांनी आठवड्यातून वृत्तपत्र (पेपर), न्यूज पोर्टल व न्यूज चॅनलला किमान ५ बातम्या पाठवणे बंधनकारक आहे.
• वृत्तपत्र (पेपर) साठीच्या बातम्या newsaksharaj 2021@gmail.com या मेल आयडीवर सायंकाळी ७ वाजेपर्यंत अचूक व फॉरमॅटमध्ये पाठवाव्यात.
• न्यूज पोर्टल व न्यूज चॅनलच्या बातम्या रात्री ९ पर्यंत ८६०५३१३२०२ किंवा ९६१९१७५२७९ या व्हाट्सअपवर स्वीकारल्या जातील.
• पत्रकारांनी बातम्या या आपल्याला नेमून दिलेल्या कार्यक्षेत्रातूनच पाठवाव्यात.
• बातम्या विषयीचे सर्वस्वी निर्णय हे संपादकांचे असतील. त्यामध्ये पत्रकारांनी हस्तक्षेप करू नये.
• प्रकाशित झालेल्या बातम्या सर्व प्रसारमाध्यम्यांवर शेयर कराव्यात.

जाहीराती विषयी महत्वाचे-

• पत्रकारांनी वर्षभरात येणाऱ्या सण, उत्सवांना (गुढीपाडवा, वर्धापनदिन, दिवाळी व नववर्ष दिनदर्शिका) ठरवून दिलेल्या जाहिरातीचे टार्गेट पूर्ण करावे.
• जाहिरात पाठवताना जाहिरात व जाहिरातीची रक्कम एकसोबतच (जाहिरात कमिशन वजा करून) पाठवावे.
• पत्रकारांना जाहिरातींवर २५ टक्के जाहिरात कमिशन दिले जाईल. (जाहिरात प्रकाशित होईपर्यंत जाहिरात रक्कम जमा केल्यास कमिशन लागू, त्यानंतर कमिशन दिले जाणार नाही)
• जाहिराती सोबत जाहिरातीचे बील दिले जाईल.
• पत्रकारांनी जाहिरातीची रक्कम व कोणतेही आर्थिक व्यवहार संपादकांशिवाय करू नये. आयकार्ड व नियुक्तीपत्र विषयी महत्वाचे-
• पत्रकाराची नियुक्ती झाल्यावर पत्रकाराला आयकार्ड व नियुक्तीपत्र त्यांचे काम बघूनच देण्यात येईल. पत्रकारांनी आयकार्ड व नियुक्तीपत्राचा कोणताही गैरवापर करू नये. तसे आढळल्यास तात्काळ नियुक्ती रद्द करण्यात येईल व गरज पडल्यास कायदेशीर कारवाई करण्यात येईल.
  आपणांस जर “अक्षराज मीडिया” सोबत प्रामाणिक, निपक्ष व निर्भीड काम करायचे असेल तर वरील
  नियमावली वाचून, लक्षात घेऊनच काम सुरु करावे.

आपल्या पत्रकारितेला मनपूर्वक शुभेच्छा !
💐💐💐💐💐💐💐💐

धन्यवाद !!!

: संपर्क :
श्री. विनोद कैलास गोरे 
(संपादक, अक्षराज मीडिया)
मोबा. ८६०५३१३२०२

प्राजक्ता चव्हाण गोरे
(सहसंपादिका, अक्षराज मीडिया)
मोबा.९६१९१७५२७९